خبرداري هاري
(اليڪشن کان متاثر ٿي لکيو ويو)
شاعر عبدالڪريم گدائي
ورهين بعد تو وٽ وري يار آيا!
اگهاڙن بکين جا کڻي بار آيا!
کڻي سبز نوٽن جا انبار آيا!
ڌتارڻ وري توکي زردار آيا!
خبردار هاري! جو ڀوتار آيا!
پراڻا شڪاري کڻي ڄار آيا!
ڪيو ميمبري اڄ اميرن کي آتو!
انهن جنهن نه تو وٽ ڪڏهن پير پاتو!
ورهين بعد تو کي وري تن سڃاتو!
ڪرڻ تو سان ووٽن جو واپار آيا!
خبردار هاري! جو ڀوتار آيا!
پراڻا شڪاري کڻي ڄار آيا!
اهي جن اوهانکي ڍڳي جان وهايو.
اهي خون جن آ اوهانجو سڪايو،
اهي جن اوهانکي آ جاهل بنايو،
اهي اڄ اوهان جا ٿي غمخوار آيا،
خبردار هاري! جو ڀوتار آيا!
پراڻا شڪاري کڻي ڄار آيا!
تڪبر جا پتلا تواضع کان عاري،
نظام ڪهن جا پراڻا مداري،
ڪري تنهنجي ڪچلڻ جي پوري تياري،
وري توکي مارڻ لئه. مڪار آيا!
خبردار هاري! جو ڀوتار آيا!
پراڻا شڪاري کڻي ڄار آيا!
ڏٺا جن ڏنا ها وفادار ٿيندا،
سدا سور ڀائي ۽ غمخوار ٿيندا،
غريبن جا همدرد ۽ يار ٿيندا،
ڦري سي غريبن جا غدار آيا،
خبردار هاري! جو ڀوتار آيا! پراڻا شڪاري کڻي ڄار آيا!
وٺي پير مرشد ۽ قرآن آيا!
خريدڻ غريبن جو ايمان آيا!
بکين جي درن تي لنگهي خان آيا!
اگهاڙن جي پيرن تي پڳدار آيا!
خبردار هاري! جو ڀوتار آيا!
پراڻا شڪاري کڻي ڄار آيا!
ملن مولوين ساڻ موٽر ڀرائي،
اٿيا ليگ وارو هي ليبل لڳايي،
هنن گرم جهولن ۾ جيپون هلائي،
اچن ڪين ها پر هي لاچار آيا.
خبردار هاري! جو ڀوتار آيا!
پراڻا شڪاري کڻي ڄار آيا!
هئي جن جي مشهور گردن فرازي،
ڪندا سا وڻن توکي آزي نيزاري،
خبردار موڳا؟ نه اڄ هار بازي،
ٺڳڻ ووٽ توکان هي عيار آيا،
خبردار هاري! جو ڀوتار آيا!
پراڻا شڪاري کڻي ڄار آيا!
وڏيرن جي منت خوشامد نيازي،
۽ پيرن فقيرن جي تقرير بازي،
سموري سياسي اٿئي چالبازي،
اڳي ڀال ڪهڙا انهن ها ڀلايا،
خبردار هاري! جو ڀوتار آيا!
پراڻا شڪاري کڻي ڄار آيا!
اڳي آزمايئه هي ڪوڙا قرآني،
انهن کان اڳ ڀي ٻڌءِ لنتراني،
کسي آ اوهان کان انهن ئي نه ماني،
بڻي اچ جي هاري جا حقدار آيا.
خبردار هاري! جو ڀوتار آيا!
پراڻا شڪاري کڻي ڄار آيا!
گدائي جي گفتن تي ويچار ڪر تون!
پلاٽن ۽ پئسن تي هرگز نه مر تون !
جو ٻٻرن کان ٻيرن جو وٺندين نه ڦر تون!
وڃائج نه اڄ ووٽ پنهنجا اجايا !
خبردار هاري! جو ڀوتار آيا!
پراڻا شڪاري کڻي ڄار آيا!
کوئی تبصرے نہیں:
ایک تبصرہ شائع کریں